Varmársamtökin fordæma skemmdarverk

Í ljósi fréttaflutnings af atburðum næturinnar í Mosfellsbæ og ásakana verktaka í garð Varmársamtakanna teljum við nauðsynlegt að upplýsa að samtökin eiga enga aðild að þeim skemmdarverkum sem unnin voru á vinnuvélum á landi Helgafells í nótt. Varmársamtökin hafa alla tíð lagt metnað sinn í vandaðan málflutning. Ofbeldisverk samrýmast ekki á nokkurn hátt markmiðum samtakanna. Þau eru miklu fremur til þess fallin að koma í veg fyrir að við náum fram okkar jákvæðu markmiðum. Stjórn Varmársamtakanna fordæmir harðlega skemmdarverkin. Ennfremur ærumeiðandi yfirlýsingar um að samtökin hafi hvatt til þeirra.

Eitt helsta markmið Varmársamtakanna er að stuðla að auknu íbúalýðræði og þátttöku íbúa í mótun bæjarfélagsins. Í þeim tilgangi höfum við margsinnis leitað eftir samvinnu við bæjaryfirvöld. Þeirri málaleitan hefur hins vegar alfarið verið hafnað. Varmársamtökin hafa ítrekað bent á nauðsyn þess að hagsmunir íbúa og umhverfis séu settir í forgang við gerð skipulagsáætlana. Einn liður í þeirri hagsmunagæslu hefur verið að hvetja bæjaryfirvöld til að fara að lögum þegar um er að ræða framkvæmdir í bæjarfélaginu. Helgafellsbyggingar ehf. hófu sl. mánudag framkvæmdir í Álafosskvos án framkvæmdaleyfis og deiliskipulags. Urðu þessi afar ögrandi vinnubrögð til þess að fólk safnaðist saman í Álafosskvos til að mótmæla sl. mánudag. Varaformaður samtakanna fjarlægði við þetta tækifæri girðingu sem búið var að reisa umhverfis vinnusvæði fyrirtækisins. Tilgangur hans var eingöngu táknrænn og ekki til þess ætlaður að valda skemmdum.
Eitt af grundvallaratriðum lýðræðisins er réttur þegnanna til að stofna frjáls félagasamtök. Þetta gerðum við í Varmársamtökunum í góðri trú. Við teljum að bæjaryfirvöld geti leyst þann ágreining sem risið hefur í bæjarfélaginu vegna framkvæmda í Álafosskvos á farsælan hátt, þ.e. með því að ástunda lýðræðisleg vinnubrögð og sýna vilja til samvinnu við íbúa.
Það er í verkahring lögreglunnar að kanna hverjir stóðu fyrir skemmdarverkunum í nótt og er vonandi að sannleikurinn líti dagsins ljós sem allra fyrst.

Athugasemdir

[Aðalheiður Þórisdóttir (IP-tala skráð) 16.5.2007 kl. 19:01]

Mér finnst það nú liggja í augum uppi hverjir bera ábyrgð af þessum skemmdarverkum.  Þetta var greinilega gert til þess að koma höggi á Varmársamtökin.  Það var spreyjað X-D á tækin en vinstri grænum er hljóðlega haldið utan við þetta, veit ekki betur en mikil óánægja hafi verið akkúrat vegna þess að stefnumál þeirra grænu manna hafi breyst eftir að í bæjarstjórn var komið.  Lítill hópur fólks hefur reynt að koma höggi á Varmársamtökin sl mánuði.  En hverjir sem þetta gerðu hafa líklegast verið ennþá þunnir og daufir í hugsun eftir kosningavökuna sl helgi, því þeir hafa ekki gert sér grein fyrir hve fáránlegt þetta er og út í hött að ætla samtökunum þetta.  Það er ekkert sem bendir til að þótt einn maður taki niður girðingaeiningu að hann ráðist í skemmdarverk á tækjum og hafi valdið töluverðu tjóni næsta kvöld, en það er það sem þeir sem bera ábyrgð á þessu hafa líklega ætlað sér að áorka með þessu, að láta þetta líta út fyrir að vera verk Varmársamtakanna.  Það er bara hreint ekki það sama að taka niður girðingu og að valda umtalsverðu tjóni á eignum. 

[Högni Snær (IP-tala skráð) 16.5.2007 kl. 20:32]

Mætti ég gerast svo forvitn að spyrja þig þar sem þetta liggur í augum uppi hver gerði þessi skemdarverk ens og þú skrifar hér svo skýrt fyrir ofan."Mér finnst það nú liggja í augum uppi hverjir bera ábyrgð af þessum skemmdarverkum". Ef þú vildir vera svo væn og upplýsa mig þar sem mig dauðlangar að vita það?

Högni Snær

[Aðalheiður Þórisdóttir (IP-tala skráð) 16.5.2007 kl. 22:40]

Ég veit ekki hver framdi þessi skemmdarverk en mér getur þótt einhverjir líklegri en aðrir, alveg eins og að einhverjum þykir líklegt að einhverjir úr stjórn Varmársamtakanna eða stuðningsmenn þeirra hafi gert þetta.  Mér finnst líklegra að einhverjir sem ekki eru stuðningsmenn samtakanna hafi gert þetta til þess að koma höggi á samtökin.  Ef ég gæti leyst þetta mál með því að segja hverjir voru að verki þá myndi ég gera það en þar sem ég sat ekki á blessuðu túninu þá get ég það ekki, ég hreinlega veit ekki hver gerði þetta.  Þú hefur eflaust þínar hugmyndir og getgátur og ég mínar. 

[Ólafur Ragnarsson (IP-tala skráð) 16.5.2007 kl. 23:20]

Ert þú Aðalheiður að gefa það í skyn að einhverjir á vegum Vinstri grænna hafi unnið þessi eignaspjöll og það í pólitískum tilgangi til að koma höggi á samtökin ? 

Með vinsemd,

Olafur Ragnarsson

Hvarfi, Mosfellsbæ

[Högni Snær (IP-tala skráð) 16.5.2007 kl. 23:37]

Ég hef engar getgátur um hverjir voru þarna að verki enda hef ég ekki skrifað opinberlega einsog þú og sagt að það liggi í augum uppi hver hafi verið þarna að verki.En það sem greip athygli mína í þessum skrifum fyrir utan þá vitneskju að þú værir með öruggar heimildir (eða að það lægi í augum uppi )hver/hverjir voru að verki.var það að þú skrifaðir að vinstri grænum sé "haldið utan við þetta "ert þú virkileg að gefa það í skyn hér á opinberum vettvangi að vinstri grænir í Mosfellsbæ séu sekir.Ef ekki hvað meinar þú með"Það var spreyjað X-D á tækin en vinstri grænum er hljóðlega haldið utan við þetta"

En ekki reyna að leggja mér orð í munn með því að segja að ég hafi mínar getgátur um hverjir sé að verki þú ert að gefa það í skyn að ég haldi að Varmársamtökin eða einhver félagi í þeim sé viðriðin málið,það dytti mér aldrei í hug og ég eða aðrir í vinstri grænum í Mosfellsbæ hafa að mér vitandi ekki sagt það.                                                               Ég virði Varmársamtökin þó svo að ég sé ekki samála þeim í þessu máli það var ennþá leifinlegt  ósammála samtökunum við búum jú í frjálsu landi.                                    En ef ég hef skilið þig rétt hér fyrir ofan þá veist þú ekki hver framdi þetta þó svo að þú segir að það liggi í augum uppi ....................Þetta eru alvarlegar ásakanir ef ég skil þær rétt.

Með kveðju Högni Snær

[Högni Snær (IP-tala skráð) 17.5.2007 kl. 00:06]

Aðalheiður Þórisdóttir... að fara með svona fleipur er graf alvarlegt mál,                                                                                                    en það er merkilegt að þú segir strax upp úr þurru að "Það er bara hreint ekki það sama að taka niður girðingu og að valda umtalsverðu tjóni á eignum.  " skrítið að mér hefði aldrei dottið hann í hug fyrr en þú fórst að nefna hann á heimasíðu samtakanna.                                     En ég er ekki sammála þér mér hefði aldrei dottið Gunnlaug í hug þó svo að þér hafi fundist hann grunnsamlegur miðað við færsluna þína hér fyrri ofan,hann er vandaðri maður en það, þó að þú viljir tengja þessi skemmdarverk og að rífa í sundur öryggisgirðingar saman þá er ég ekki sammála þér.

Högni Snær

[Aðalheiður Þórisdóttir (IP-tala skráð) 17.5.2007 kl. 00:22]

Ég óska eftir að Varmársamtökin taki út athugasemdir mínar þar sem þær hafa valdið misskilningi og ég beðin um að láta fjarðlægja þær.  Ég var ekki á neinn hátt að saka einhvern ákveðinn um verknaðinn heldur að segja að ég tryði ekki að Varmársamtökin hefðu staðið á bakvið þetta. 

Með vinsemd, Aðalheiður

[Valdi Sturlaugz (IP-tala skráð) 17.5.2007 kl. 11:08]

Væntanlega trúir enginn því í reynd að Varmársamtökin eigi þátt í þessu og kjánalegt af verktakanum að bendla samtökin við þetta.  Einhver sagði að þeir væru búnir að ráða fyrirtæki í PR-vinnu til þess að bæta ímyndina, en það hlýtur að vera einhvert bull eins og þeir haga sér.  ÉG vona að raunverulegur vilji sé til þess að komast til botns í málinu.  Sannleikurinn er sá að enginn heilvita maður vinnur svona skemmdarverk og nánast fjarstæðukennt að einhverjar hugsjónir liggi að baki.  

Sá í mogganum að Karl Tómasson er ennþá að herma þverun yfir Varmá upp á ykkur hjá samtökunum.  Ef ég hef skilið rétt er tillagan að því alls ekki frá ykkur komin.  Kannski að Helgafellsbyggingar ættu að bjóðast til þess að kaupa PR-þjónustu fyrir bæjarstjórnina líka.  Nýjar samskiptaaðferðir gætu stuðlað að aukinni sátt í ykkar fallegu sveit. 

Með baráttukveðjum úr Breiðafirði, Valdi

[Ólafur Ragnarsson (IP-tala skráð) 17.5.2007 kl. 22:08]

Ég kom með smá athugasemd hér í gær í umræðunni en mér til mikillar furðu hefur sú athugasemd verið fjarlægð !  Er það vegna þess að athugasemdin var óþægileg eða er þetta kannski íbúalýðræðið mikla í framkvæmd ?

Ólafur Ragnarsson, Hvarfi, Mosfellsbæ

[Sigrún P (IP-tala skráð) 17.5.2007 kl. 22:50]

Sæll Ólafur.  Konan sem þú varst að svara bað um að athugasemdin sem þú varst að gera athugasemdina við væri tekin út og við urðum við þeirri ósk. Svarið þitt átti því ekki lengur við og vonum við að þú sýnir því skilning.
Við tökum öllum þeim fagnandi sem vilja taka þátt í því með okkur að koma af stað uppbyggilegri umræðu um skipulagsmál í Mosfellsbæ. Það er tilgangurinn með bloggi samtakanna.

[Guðmundur H. Bragason, 17.5.2007 kl. 23:19]

Ætli það séu einhver vinatengsl milli Sea Shepard samtakanna og Varmársamtakanna?  vinnubrögðin hjá þeim eru farin að vera ansi nálægt hvorum öðrum.

[Gunnlaugur B Ólafsson, 17.5.2007 kl. 23:59]

Guðmundur og Hjördís enn að dansa tangó, en hvar eru Halldór og Ingibjörg?

[Sigrún P (IP-tala skráð) 18.5.2007 kl. 00:17]

Sæll Valdi. Forseti bæjarstjórnar Mosfellsbæjar virðist enn ekki hafa áttað sig á því að hugmyndin að þverun Varmár við Álanes ofan við Álafoss er ekki frá Varmársamtökunum komin.
Staðreynd málsins er sú að þessi vegtenging er inn á aðalskipulagi Mosfellsbæjar og er einnig gert ráð fyrir henni í nýju deiliskipulagi Helgafellslands, 3. áfanga. Varmársamtökin lögðu til við bæjaryfirvöld í athugasemdum við deiliskipulaginu að þessi tenging yrði alfarið tekin út af skipulaginu. Þann 10. apríl sl. fengum við svar frá bænum þess efnis að ekki væri hægt að verða við ósk samtakanna. Svarið er svohljóðandi:
"Það er rétt að tengibraut á þessum stað var felld út úr aðalskipulaginu við síðustu endurskoðun. Í aðalskipulaginu var hins vegar í stað hennar gert ráð fyrir "safngötu sem fellur betur að umhverfi Álafosskvosar og árinnar, ...
Nefndin telur óvarlegt á þessu stigi að falla frá gerð þessarar safngötu, en telur jafnframt rétt að þörf fyrir götuna verði endurmetin síðar, eftir að hverfið hefur byggst upp."
Sbr. 196. fund skipulags- og byggingarnefndar.
Það er því ekki að tillögu Varmársamtakanna að þessi gata er staðsett þarna heldur að tillögu bæjaryfirvalda sjálfra. Við töldum nauðsynlegt að gera íbúum grein fyrir þessari tengingu í tillögum okkar sem við og gerðum á þinginu sl. laugardag.

[Ólafur Ragnarsson (IP-tala skráð) 18.5.2007 kl. 01:55]

Gott og vel Sigrún, þetta er nú allt að verða nokkuð ruglingslegt en ég sé að þessi athugasemd sem ég var að svara er farin út.

Það verður að segjast að ég sem íbúi við Varmá síðan á dögum mikifenglegra axlapúða fann mig knúinn til að kynna mér um hvað málin snerust.  Ég er nú frekar einfaldur og auðtrúa þannig að ég hélt að þessi samtök væru vettfangur fyrir skoðanaskipti og rökstuðning þar sem óhætt væri að slá á létta strengi í bland með alvörunni.  Það sem hefur komið mér á óvart er hversu miklar og heitar tilfinningar eru að krauma hjá fólki og hversu mikil heift og reiði virðist hafa búið sér stað í hugum og hjarta þeirra einstaklinga sem eru áberandi í framvarðarlínunni.  Maður les pistla og svör fram og tilbaka sem einkennast af persónulegri andúð og ásökunum á víxl milli deiluaðila.  Hvað varðar samtökin þá er það er engu líkara en að samtökin hafi fundið sér tákngerfinga hins illa í bæjaryfirvöldum í Mosfellsbæ, yfirvöldum sem eru jú lýðræðislega kosin af bæjarbúum til að sinna málefnum svæðisins fyrir okkar hönd. 

 

Þessi uppákoma nú þar sem stórfelld eignaspjöll eiga sér stað er nokkuð sem að allir aðilar þurfa að taka til alvarlegrar umhugsunar.  Það sliptir ekki máli í þessu samhengi hvort kom á undar eggið eða hænan í deilunni, það sem skiptir máli eru afleiðingarnar sem verða af deilum sem þessum.  Ég held að enginn þokkalega hugsandi maður ætli forráðamönnum samtakanna þennan gjörning, eða að einhverjir aðrir deiluaðilar hafi staðið að þessu.  Hinsvegar geta deiluaðilar ekki skorist undan ábyrgðinni af þessum eignaspjöllum þar sem þau eru auðsjánlega framkvæmd af einhverjum óvitum sem hafa orðið fyrir áhrifum af deilunni og telja sig vera að gagnast málstaðnum.

 

Mál þetta hefur verið blásið lang út fyrir tilefni í fjölmiðlum þar sem þetta er látið líta út fyrir að vera stór hluti bæjarbúa að mótmæla yfirgangi vondu madonnunar, svikula græna kallinum með fulltingi hræðilegu vélskóflunnar.  Það er hamrað á því að stórfelld náttúruspjöll séu að eiga sér stað sem vart eiga sinn líka.  Þegar kallað er í fjölmiðla eru nokkrir einstaklingar sjáanlegir, myndavélum er beint nálægt fólki svo fámennið verði ekki vandræðalegt og þar birtist skælandi stúlka í móðursýkiskasti og varaformaður sem lætur eins og himin og jörð séu að farast og ræðst á girðingar með offorsi.  Táknrænt segir hann, en það kom ekki fram, þetta gaf bara tóninn fyrir þá sem upplifðu þetta sem köllun til verka.

 

Ég veit ekki hvað skal segja en smámál sem þetta sem fjallar um skipulagsmál í bæjarfélagi, um hvort að þessi blettur á að vera friðaður eða ekki, þetta er frá mínum sjónarhóli fullkomlega til þess fallið að kasta rýrð á baráttuna um verndun náttúru Íslands.  Svona mikið púður og illindi vegna vegspotta, allt þetta tal um stórfelld umhverfisspjöll, umhverfismat, yfirgang, svik, þetta gerir það að verkum að þeir sem umhverfisverndasinnar eru að reyna að fá til að opna augu sín fyrir nauðsyn þess að vernda hálendi Íslands og nauðsyn þess að meta umhverfisáhrif í stóru samhengi, þetta fær efasemdarmennina til að snúa sér frá og hrista höfuðið yfir þessu “öfgaliði” og þannig tapast baráttan. 

 

Mér þykir vænt um Varmá og umhverfið hér enda hef ég búið við ána í áraraðir og alið börnin mín upp hér.  En staðreyndin er sú að Varmáin sem er nú oftast bara spræna nema í leysingum er ein skítugasta á landsins með dauðan fisk upp um alla á og er það ekki af völdum vegspottans vonda.  Það væri nær að beina kröftum sínum að því að gera gott úr því sem við höfum í sátt við bæjaþróunina, að hreinsa ána og halda áfram að gera umhverfi hennar aðgengilegt.  Í guðanna bænum finnið sátt í þessu máli þannig að þetta verði ekki dæmt sem einkahagsmunamál íbúa Álafosskvosarinnar sem vilja henda veginum vonda frá sér upp í barnahverfið fyrir ofan.

 

Með vinsemd,

Ólafur Ragnarsson, Hvarfi, Mosfellsbæ

[Sigrún P (IP-tala skráð) 19.5.2007 kl. 12:32]

Sæll Ólafur. Sé á athugasemdum þínum að þú þyrftir að kynna þér betur málflutning Varmársamtakanna.  Á blogginu er mikið af greinum sem varpa ljósi á baráttuaðferðir samtakanna og mæli ég með að þú kíkir á þær.