Hveri aftur upp á yfirborðið í Mosó?

Það tæki hverina í og við Varmá aðeins eitt ár að komast aftur upp á yfirborð jarðar ef Orkuveitan hætti dælingu jarðhitavatns úr iðrum Mosfellsbæjar til Reykjavíkur, var svar Gríms Björnssonar jarðeðlisfræðings við fyrirspurn Varmársamtakanna á fyrirlestri sem hann hélt undir yfirskriftinni "Nýting og afturkræfni háhitasvæða" í Háskóla Íslands í gær.
Í fyrirlestrinu kynnti hann jarðfræðirannsóknir sem nú standa yfir á vegum Orkuveitu Reykjavíkur á jarðhitavatnsforða svæðisins í og við eldstöðina Hengil. Kom fram í máli Gríms að ágeng vinnslustefnu gæti leitt til ótímabærrar eyðileggingar á jarðhitasvæðum. Öllum væri fyrir bestu að hafa sjálfbærni að leiðarljósi í tengslum við jarðhitanýtingu þar sem ofnýting ynni í raun gegn hagsmunum eigenda jarðhitasvæða. Sumpart væri erfitt að sjá fyrir áhrifin af jarðhitanýtingu á háhitasvæðum vegna þess að lítil reynsla væri komin á nýtinguna og nauðsynlegt að vitneskja bærist frá kynslóð til kynslóðar til að auðvelda greiningu á áhrifum hennar.
Taldi Grímur af hinu góða að mat á umhverfisáhrifum jarðhitanýtingar skipti sífellt meira máli þegar teknar væru ákvarðanir um staðsetningu mannvirkja sem tengjast virkjunum.
Sagði Grímur að ofgnótt vatns væri að finna undir yfirborði jarðar og að auðvelt væri að komast í forðabúrið í jarðskorpunni á Íslandi. Vatnið af háhitasvæðinu á Hellisheiði væri auk þess mjög gott. Lítið um steinefni og gas.

Sömu sögu er reyndar að segja um gæði vatnins af Varmársvæðinu sem flokkast undir lághitasvæði. 60% af vatninu sem rennur um hitaveitulagnir Reykjavíkur á sér upptök í iðrum Mosfellsbæjar.
Hvernig litist ykkur annars á að endurheimta þessa einstöku auðlind upp á yfirborð jarðar í Mosfellsbæ? Er ekki bara tími til kominn að njóta lífsins í þessu bæjarfélagi og svamla um í Varmá, opna hér tyrknesk böð og heilsulindir á heimsmælikvarða  - svona um það leyti sem vatn af Hellisheiði fer að renna um hitaveitulagnir í Reykjavík? Eigum við ekki bara að gera ráð fyrir þessu strax í upphafi framkvæmda við Hengil?

sp

Athugasemdir

[Hjördís Kvaran (IP-tala skráð) 30.3.2007 kl. 01:10]

Athyglisvert og ekki slæm hugmynd. En hefur verið gerð athugun á hvernig hitinn færi með endurreist lífríki Varmár t.d. fiskinn og sefið? Myndi það lifa það af ef hitaveituvatni yrði hleypt í ána að nýju? Kom Grímur eitthvað inn á það?

Hjördís Kvaran

[Sigrún P (IP-tala skráð) 30.3.2007 kl. 01:35]

Það myndi breyta lífríkinu í Varmá ef áin endurheimti aftur sína náttúrulegu eiginleika. Það var fiskur í Varmá áður en nýtingin hófs, m.a. áll. Í dag fer hitastig vatnsins mest í 16-17 gráður á sumrin, fyrir nýtingu náði það 27 gráðu meðalhita á heitasta tíma.
Grímur var mest að ræða um Hengilinn og komum við með fyrirspurnir í lokin. Þetta er afar spennandi tema. Hugmyndin er djörf en ég tel að það gæti orðið af því mikill samfélagslegur ávinningur að færa ána í fyrra horf. Það yrði mikil lyftistöng fyrir ferðaþjónustuna á höfuðborgarsvæðinu að skapa hér svipaðar aðstæður og í Landmannalaugum. Það er ofgnótt vatns undir yfirborði jarðar og auðvelt að komast að því Íslandi að sögn Gríms. Því ekki að nýta þessa einstöku auðlind með þessum hætti.
Kv. sp

[Hjördís Kvaran (IP-tala skráð) 30.3.2007 kl. 01:48]

Ok, flott. En hafa hugmyndirnar verið útfærðar eitthvað meira en á hugmyndastigið? Þá meina ég með tilliti til hvar svona ferðamannaaðstaða gæti þrifist með tilliti til umhverfisins eins og íbúabyggðar? Þar er ég t.d. að hugsa um að mörgum þykir ekki góð lyktin af hitaveituvatni eða brennisteini í næsta nágrenni við sig (sumir fá flog við það eitt að rör springi í nágrenninu), en kannski verður þetta ekki vandamál. En þetta eru athyglisverðar pælingar og væri gaman ef að gengið yrði í það að fá heildarúttekt á kostum og göllum - t.d. varðandi lífríkið. Þar er ég að hugsa um að fyrir um tveimur árum slapp töluvert af heitu vatni í ána og drap allt sem fyrir varð, sérstaklega fiskinn. Það  var líka mun heitara vatn en 28 gráður held ég.

Takk fyrir svarið, þetta er með betri hugmyndum samtakanna sem ég hef séð.

Hjördís 

[Sigrún P (IP-tala skráð) 30.3.2007 kl. 18:01]

Vatnið sem fór í ána var yfir 80 gráðu heitt og því ekki nema von að fiskurinn dræpist. Við búum á lághitasvæði sem þýðir að hitastig vatnsins er lægra og minna um uppleyst efni en á háhitasvæðum. Lítill sem enginn brennisteinsfnykur er því af vatninu héðan.
Hugmyndir eru til alls fyrstar.

Kv. sp

[Gunnlaugur B Ólafsson, 30.3.2007 kl. 18:35]

Þetta hefur mér alltaf þótt svo spennandi síðan Sigrún fór að leita uppi staðsetningu hveranna. Líka væri það frábært fyrir Mosfellsbæ ef mögulegt er að koma upp aftur góðri útilaug aftur ofan við Álafoss. Þá væri nú ennþá meira gaman að lifa, ef það er hægt að trimma á eins og eitt fell og fara svo í ylheita útilaug í Varmá. Þetta gæti verið raunhæfur möguleiki ef leitt er til borgarinnar það vatn sem fellur til við Hellisheiðarvirkjun, þá gæti verið hægt að létta á dælingunni frá Mosfellsbæ. Hugsanlegt væri að Mosfellsbær keypti af Orkuveitunni hluta réttindanna eða jafnvela að Orkuveitan kæmi að því að byggja upp slíka útivistarparadís á höfuðborgarsvæðinu. Það myndi nú aldeilis efla og styrkja ímynd fyrirtækisins meðal almennings.

[Sigrún P (IP-tala skráð) 30.3.2007 kl. 20:31]

Fyrir mannlífið í Mosfellsbæ væri útilaug frábær lyftistöng. Við tölum nú ekki um alla túristana sem spyrja um leið og þeir stíga út úr flugvél í Keflavík hvar næstu heitu laug sé að finna.

Því miður eru uppi plön hjá Mosfellsbæ um að setja 1500 fermetra settjörn, til hreinsunar ofanvatns af götum og þökum Helgafellshverfis, fyrir ofan Álafoss. Er tjörnin staðsett á verndarsvæðinu við bakka Varmár. Önnur settjörn er síðan í bígerð á móts við gervigrasvöllinn neðan Vesturlandsvegar. Sú er 2000 fermetrar á stærð. Báðar settjarnirnar eru opnar og einn og hálfur meter á dýpt við venjuleg skilyrði en dýpka í leysingum.
Ég get ekki varist þeirri hugsun að réttsýni og virðingin fyrir menningarsögu sveitarfélagsins hafi enn ekki haldið innreið sína hjá skipulagsaðilum í Mosfellsbæ.

[Sigrún Guðmundsdóttir (IP-tala skráð) 31.3.2007 kl. 09:21]

Ég hef trú á að bærinn endurskoði áætlanir um settjarnirnar.Það hafa jú talsverðar breytingar orðið á áætlunum undanfarið  Kíkti við á ráðstefnu í gær um vötn og ár (vatnakerfi) og höfuðborgarsvæðinu en ráðstefnan var m.a. hugsuð sem fyrsta skref að samræmdum áætlunum og verndaraðgerðum á höfuðborgarsvæðinu.  Það er margt spennandi í deiglunni - sérstaklega væri spennandi að fá að vita meira um ástand jarðvarmasvæðanna hér í bænum og sérstaklega endurheimtar jarðvarmans í Varmánni 

[Ragnheiður Magnúsdóttir (IP-tala skráð) 11.4.2007 kl. 20:50]

Mér líst vel á þessa hugmynd!! Efla mannlífið í Mosfellsbæ yrði mjög jákvætt. Ferðamenn auka tekjur heimamanna og getum við tekið Frakka sem fyrirmyndir, en þeir eru snillingar í að búa til ferðaleiðir og söfn um allt sem tengist landi sögu og þjóð.

Þá er heldur betur kominn tími til að fólkið fái einhverju að ráða í skipulagsmálum bæjarins! Og að bæir í Evrópu verði teknir sem viðmið.